Múlakot með meiru
Efnisyfirlit:
Múlakot - fljúgandi skemmtun!
Múlakotsflughátíð Flugmálafélagsins verður að venju á sínum stað í Fljótshlíðinni um
verslunarmannahelgina, 1.-4. ágúst nk. Dagskráin verður að mestu leyti með því hefðbundna
sniði sem flest flugáhugafólk þekkir enda hefur hún lukkast vel undanfarin 20 ár.
Meðal dagsskráratriða eru síðari hluti Íslandsmeistaramótsins í listflugi 2003
og auðvitað lendingarkeppnin góðkunna. Og að sjálfsögðu einnig útivera,
góður félagsskapur, grillmatur, söngur, glens og grín!
Sjá nánar tilkynningu frá Flugmálafélaginu. Veðurspáin fyrir næstu daga er nokkuð góð, svo nú er bara að taka saman föggurnar og flugvélarnar og drífa sig austur í Múlakot.
Krabbmeinsveik börn fá upplyftingu
Helgina 25.-27. júlí hélt Styrktarfélag krabbameinsveikra barna sumarhátíð sína í Fljótshlíð. Eins og fyrri ár, komu nokkrir einkaflugmenn í heimsókn og buðu þeim krökkum og foreldrum sem það vildu, í flugferð um Fljótshlíðina. Þetta var hinn skemmtilegasti dagur og mátti vart
á milli sjá hvort skemmtu sér betur krakkarnir, foreldrarnir eða flugmennirnir.
Maggnús Vikingur á
TF-REF, hefur stjórnað þessu flugi af röggsemi undanfarin ár og lét hann sig að sjálfsögðu ekki vanta, en einnig voru þarna flugvélarnar:
TF-ULV,
TF-ULF,
TF-EOS,
TF-JMH og
TF-STR.
Einkaflugmenn skoða Piper Archer III
Umboðsaðili Piper í Danmörku, Air Alpha, kom til Íslands með nýja flugvél, Piper Archer III, Sunnudaginn 27. júlí.
Vélin var til sýnis á Reykjavíkurflugelli við Félagsheimili Einkaflugmanna í Fluggörðum frá kl. 14:00 til 18:00.
Margir áhugasamir einkaflugmenn mættu á svæðið, skoðuðu vélina hátt og lágt, og fóru með hana í prufuflug.
Jafnframt mættu eigendur ýmissa Piper-flugvéla á Íslandi með gripina sína á staðinn.
Á myndinni má sjá nokkra áhugasama virða vélina OY-LAG fyrir sér.
Piper Archer III kom fyrst á markað árið 1996 og þykir henta sérstaklega vel til kennslu- og atvinnuflugs og ekki síst til einkaflugs.
Það sem einkennir hana hvað útlit snertir, er straumlínulöguð vélarhlíf með frekar litlum loftgötum,
en innréttingar hafa líka verið endurbættar og er hún mun hljóðlátari en eldri vélar.
Vélin er með 180 hestafla Lycoming O-360-A4M hreyfil og fastri loftskrúfu.
Hún nær mest 133 hnúta hraða, krúsar á 128 og ofrís á 45 hnútum.
Flugtaksvegalengd er 346 m og til lendingar þarf 280 m (hvort tveggja miðað við 50 feta hindrun).
Hún er vel búin tækjum eins og sést á myndinni hér til hliðar.
Verð á nýrri vél er frá 205.500 USD, eða um 17,5 milljónir íslenskra króna.
Flug kynnt almenningi í Smáralind
Flugmálafélag Íslands hélt kynningu fyrir almenning á flugi og flugtengdu starfi, í Vetrargarðinum í Smáralind helgina 25.-27. júlí.
Þar var stillt upp flugvélum, svifflugum, svifdrekum, flugmódelum og kynningarbásum svo gestir og gangandi gætu heillast af heimi flugsins.
Þetta var gert m.a. í tilefni 100 ára afmælis flugsins á þessu ári og til að vekja áhuga sem flestra á flugi og öllum þeim ævintýrum sem því tengjast.
Flugfélagið Atlanta, Iceland Express, Vífilfell, Flugskóli Íslands, Svifflugfélagið, Svifdrekafélag Reykjavíkur og fleiri studdu þetta framtak rausnarlega.
Gunnar Þorsteinsson, starfsmaður Flugmálafélagsins, telur að fjöldi gesta hafi skipt tugum þúsunda og að þessi uppákoma hafi hjálpað almenningi að fá yfirsýn
yfir þá fjölbreyttu flugstarfssemi sem stunduð er um allt land.
Nýr lendingarstaður: Vatnsnes í Grímsnesi
Skv. upplýsingum á vef Flugmálastjórnar, hefur nýr lendingarstaður verið settur á skrá.
Hann ber táknið BIVA, og er staðsettur á Vatnsnesi í Grímsnesi.
Brautin er grasbraut 796 metra löng og 25 metra breið og brautarstefnur eru 03/21. Hæð brautar er 167 fet.
Viðmiðunarpunktur er 64°01´59,203N og 20°39´03,709W.
Háspennulína þvert yfir Hvítá er um 1,3 km norðan við braut. Brautin er í einkaeigu en öllum er heimilt að nota hana.
Umsjónarmaður er Þorsteinn Magnússon, en hann hefur símana: 486-4497, 486-4453 og 893-6568.
Einkaflugmenn fagna þessari flugbraut, því undanfarin ár hafa margir flugvellir verið aflagðir.
Frönsk einkaflugvél í vandræðum
Einshreyfils, frönsk flugvél af gerðinni
Piper Malibu, á leið frá Reykjavík til Grænlands,
lenti í vandræðum vestur af landinu 7. júlí sl. Hún hafði lagt af stað kl. 07:21 áleiðis til Narssassuaq,
en rúmlega klukkutíma síðar varð vart við gangtruflanir og hélt hún ekki lengur hæð.
Flugmaðurinn leitaði eftir aðstoð þar sem fyrirsjáanlegt var að hann næði ekki landi,
en þá var vélin um 200 sjómílur frá landi. Tveir voru um borð.
Þyrla Landhelgisgæslunnar,
TF-LIF, og flugvél Flugmálastjórnar,
TF-FMS, voru sendar til móts við flugvélina og fylgdi hin síðarnefnda henni til Reykjavíkur síðustu 40 sjómílurnar, þar sem hún lenti heilu og höldnu kl. 10:06.
Sjá nánar frétt á Mbl.is
Athyglisverð vefsíða um flug
Vefsíðan sem við mælum með í þessu tölublaði Flugfrétta, er flugmyndavefur Baldurs Sveinssonar,
www.verslo.is/baldur.
Baldur er flugáhugamönnum vel kunnur og hefur hann lagt af mörkum drjúgan skerf til varðveislu
flugsögu Íslands. Baldur hefur tekið til við að skrá sögu Neptunus flugvélanna,
sem voru í notkun á árunum 1950-1970. Til hamingju Baldur, með litríkan vef!
Aðrar flugfréttir
Hér eru nokkrir tenglar á ýmsar aðrar flugfréttir, en það er alltaf nóg um að vera í flugheiminum:
RNF:
Skýrsla v/flugatviks TF-JME á Hornafirði (PDF-skjal)
Geirfugl:
Flugmót Geirfugla á Hellu 2003
Geirfugl:
Hópflug á hálendið
MBL:
Eldingu laust niður í Fokker-flugvél: Farþegar fundu fyrir högginu
MBL:
Flugvél með óvenjulegt útlit
Iceland Express:
Áfram góð sætanýting hjá Iceland Express í maí
Flugfelag.is:
Metro vél frá Flugfélaginu lenti aftur á Akureyrarflugvelli
Íslandsflug:
Tvær farþegavélar bætast í flotann
VFA:
TF-CUB 60 ára + Haukur Jónsson hlutskarpastur í lendingakeppni VFA
LHG:
Þyrla Landhelgisgæslunnar send til aðstoðar franskri eins hreyfils flugvél
LHG:
Þyrla Landhelgisgæslunnar sótti slasaðan rússneskan sjómann
LHG:
Tveir menn fluttir með þyrlu til Reykjavíkur eftir útafakstur
Athugið að hægt er að smella á flestar myndanna til að skoða þær í betri upplausn.
Fleira var það ekki að sinni, ágætu lesendur. Ef þið þekkið einhvern sem þið teljið að kunni að meta þetta
fréttarit, vinsamlega bendið honum á skráninguna á www.flugheimur.is/flugfrettir
og segið honum hvað ykkur finnst um Flugfréttir! Ef margir sýna þessu fréttariti áhuga, er hægt að vanda gerð þess enn meir.
Lumar þú á frétt, heilræði eða fróðleiksmola sem hér á heima? Sendu okkur þá skeyti
og að launum færðu þá gleðitilfinningu að hafa lagt eitthvað af mörkum fyrir íslenska flugheiminn!
Bestu kveðjur,
Ingólfur Helgi Tryggvason
ritstjóri og flugdellukarl
hafa nú lesið þetta skeyti skv. www.digits.com vefmælingu.
